面試要做自己？「唔係呀嘛？咪玩啦，做自己實見唔成啦。」有啲人可能會咁諗。其實見工唔係做戲，唔做自己做邊個？
首先，唔好極端化「做自己」呢幾個字，「做自己」嘅意思唔係等於有嗰句講嗰句，平時講嘢用開嘅強烈助語詞都繼續用？平時唔出聲嘅都繼續唔出聲？直接將自己嘅缺點表露無遺。傻的嗎？
面試做到「做自己」嘅人通常都可以顯示出較強嘅自信心，因此成功率都會比較高。你可能覺得自信心唔係人人有，但我相信每個人都有屬於自己嘅長處，要做嘅只係將呢個自己表達出嚟。
答面試官想聽嘅答案真係work?
大部分人對面試都有一個常見嘅錯誤，就係過份猜度面試官想聽嘅說話。有人甚至會上網做research，照板煮碗將答案講出嚟。呢類所謂「面試官想聽嘅答案」，通常都缺乏新意，有經驗嘅面試官都應該聽過無數次。而因為答案唔屬於求職者自己，通常都經唔起面試官嘅挑戰。
喺面試入面，面試官需要肯定求職者心中嘅想法，所以會不時挑戰求職者嘅答案。好多人因為講嘅答案唔係佢自己嘅想法，被面試官挑戰時要即場諗方法自圖其說。緊張情緒呢個時候會好自然咁出現，然後會連同身體語言，好快、好真實咁呈現喺面試官眼前，結果說服力自然減半。
你可能話，我可以再準備多啲，諗埋佢點挑戰我咪得。咁即係同考試貼題一樣，貼中就神仙，貼唔中就肥硬。而面試嘅問題，好多時都係不可預測。
收過warning都可以「做自己」
HR朋友同我分享過一個case，有一次佢要請一個客戶服務主任 (Customer Service Executive)，面試時同主管一齊見咗個求職者叫大膽仔。大膽仔全程表現得幾有自信，主管問到佢有冇收過警告信，佢好老實咁話收過一次，原因係為咗滿足客人，違反咗上司嘅命令。你可能覺得佢好蠢，點解要食誠實豆沙包？但係大膽仔決定要做返自己。
主管挑戰佢：「服從上司好重要，點解你唔聽指示？」
大膽仔答得好快：「因為我認為當時咁做係可以最快解決到客人嘅問題。」然後詳細解釋事情嘅來龍去脈。最後主管請咗佢，因為除咗覺得大膽仔有自信，佢認為除咗聽話，識變通都好重要。
試想下，如果當時大膽仔嘗試猜度面試官係想要一個聽話嘅員工，佢可能會選擇承認自己嘅過失。然後主管會問佢：「你明知錯都要跟上司做法？」因為呢個「聽話」嘅答案唔係佢自己嘅諗法，當佢要即時自圖其說，自然會覺得緊張，自信心下降，直接影響主管對佢嘅睇法。
其實「做自己」每個人都可以，只要建立足夠自信，就可以真誠而清晰咁表達自己。好多時面試官其實唔係想聽到一啲「好行」嘅答案，而係希望真正咁了解到求職者本身。
