農曆新年剛過，搵開工嘅朋友，都知道呢段時間係轉工嘅旺季，而事實，自己作為一個部門嘅經理仔，都收到好多求職信。自己由以前答問題嘅candidate，到今日成為問問題嘅interviewer，對見工呢回事，又有新嘅體驗。
其中一個新體驗，發覺原來interviewer都幾被動，candidate先係主動嘅一位。
就用自己近排嘅經驗解說一下:
過左新年，公司終於有headcount比自己，咁即刻約見一堆candidates，希望盡快有人幫輕下沉重嘅工作量，但見左八至十位之後，感想係…究竟點揀好？
A先生，性格開朗，工作技能知識不俗，加上有魄力有熱誠，好似幾唔錯，可惜工作經驗太少，想法過於天馬行空，難以實行。
B小姐，言行舉止優雅，大公司打滾過，工作經驗相當足夠，係一位辦公室政治能手，一定可以幫忙解決好多部門之間嘅合作問題，可惜相關技能不足，係研發方面全無頭緒，或者唔識去handle突來其來嘅新project。
C先生，技能經驗都足夠，可惜份人太自我，無乜團隊精神，得罪人多稱呼人少，正所謂請鬼容易送鬼難，我怕請左佢之後會衍生更多問題要解決。
之後幾個，每個人都有優有缺…我知，人無完美，唔好雞蛋裡挑骨頭嘛，之但係每位都差唔多，唔知點揀好…其實只要有一位candidate較為突出，已經可以拍板請人。
又令我諗起，點解我上一次見工之後，就算婉拒左個offer，對方HR都仲會搵我。
話說上一次，見一份大公司嘅高級職位，一入房即刻嚇一嚇，竟然有四位interviewers。雖然我嘅工作崗位係需要同多個部門交涉（所以B小姐其實好適合），但都唔洗咁多人呀？interview開始都好好地，大家都好有秩序發問，我仲可以答得有條有理，不過慢慢，大家越問越急，甚至乎Marketing director同IT Head之間嘅問題互相抵觸…我都真係唔知點答好。
呢個時候，我問HR head：「麻煩有無紙同筆？」
大家都唔知我做咩嘅時候，我繼續講：「我可唔可以先抄低晒大家嘅interview問題，分類整合，再答大家問題？因為我唔希望講一個好肯定嘅答案比Marketing director之後，轉頭係另一個類似問題上，有一個完全相反嘅答案比IT head，令你地覺得我好份人混亂好搖擺；有D問題，分開答，同一齊答，答案可以好唔同。」
之後個interview變成左一個group discussion，大家拎晒所有問題出來，分類，再討論，解決。
幾張白紙最後成為左一個計劃既雛型，而隔左一排我望返呢間公司其中一個promotion，硬係覺得同當日interview嘅idea有幾分相似。
當然，我唔會話interview拎枝筆出來係一條絕世好橋，相反，可能會有interviewer覺得你咁都聽唔明唔記得，扣你分；我想講嘅係，interview係要盡力去突出自己嘅長處，而長處就係日常磨練出來嘅應變能力經驗；抄低問題再去分析解決，就係我日常嘅工作，就係最代表到自己嘅能力同經驗。
茫茫人海中，只要認識到自己嘅長處，突出到你自己，成功機會就自然會高好多；求職中，人揀你，同樣可以你揀人，candidate可以站於絕對主動嘅位置，只要你認識到自己。
講返近排先，早幾日，終於比我遇到一位合適嘅candidate，雖然性格經驗技能都唔算最出眾，但佢主動講得出上一份工點樣用一個新穎嘅角度去分析，而且佢好明白同知道自己要做乜，呢一點非常突出，我即刻叫HR請佢。
點知佢reject左個offer…
我都話candidate只要認識同突出到自己，基本上係唔需要驚，因為揀工嘅主動權就係你手上，作為interviewer，其實好被動。
