試想下，有一日你終於等到你心儀嘅公司打電話比你約你去見工，然後你感到非常興奮，覺得終於有機會入到呢間夢寐以求嘅公司。你喺見工前做足準備，搜集好多有關資料、預備面試嘅問題，甚至搵埋朋友幫你準備。
當你諗住面試萬無一失，誰不知你竟然喺入去面試之前食咗啲唔知乜嘢而導致見唔成份工，你話幾唔抵呢？有時好多人都將注意力集中喺入房面試、同Interviewer嘅對答過程當中，但往往忽略咗面試前要留意嘅地方，特別係食咗啲乜。
1. 食煙
強哥一向都有食煙嘅習慣，面試當日，強哥唔知係咪因為太緊張，喺等候面試期間，離開咗等候位置好幾次去「呼吸」。強哥今日見嘅係一個文職職位，今次負責同強哥面試嘅Interviewer係HR嘅毛小姐同埋部門主管。當強哥開始介紹自己嘅時候，兩位Interviewer就開始聞到一陣濃烈嘅煙草味，喺細小嘅面試室入面積聚起嚟。煙味唔係人人頂得順，毛小姐同部門主管都係其中之一。毛小姐感覺到部門主管嘅氣場改變，停止發問，呢個已經係表示佢唔鍾意眼前呢位Candidate嘅先兆。當強哥離開之後，部門主管只係講咗句：「陣煙味太勁，我頂唔順，叫下一個入嚟。」
唔係話唔食得煙，不過最好揀啱時間食。面試前最好唔好食，要食等見完工慢慢食。明明好大機會見得成份工，但因為咁而令人對你留低唔好嘅印象，你話幾唔抵呢？
2. 味道濃烈嘅食物
如果你嘅Interview被安排喺午飯之後，請特別留意自己嘅午餐食啲咩。有啲會導致有濃烈口氣嘅食物都盡量唔好食，特別係經常會食到嘅蒜。仲有其他氣味濃烈嘅食物例如臭豆腐、榴連等都唔好食住，不過斷估都唔會食呢啲做Lunch掛。
3. 食香口膠
好啦，上面話唔食得煙又唔食得蒜，咁我食舊香口膠清清口氣得喇掛？唔得？唔係呀？其實唔係唔食得香口膠，不過食完最緊要記得吐。試想下，如果你食住香口膠嚟面試，舊膠喺個口入面咬嚟咬去會比到人一種咩感覺？首先會比到人一種態度唔認真嘅感覺，而且仲會有少少輕佻添。所以食香口膠唔緊要，最好喺去到公司之前食，入去之前就盡快吐咗去先。如果唔記得咗，入到去面試先同人講：「等等！等我吐埋先。」咁就有少少樣衰喇。
