呢日有位新人叫花師奶，第一日嚟到薯仔公司報到返新工。花師奶係真係一位「師奶」，入職前係一位家庭主婦。佢曾經做過管理層人員，不過因為公司人事轉變，最後被逼離開，之後就喺屋企照顧家人。人到中年，仔女亦都長大，所以決定重投社會，一心搵一份穩定嘅工作。
佢唔需要高職位，只求安穩到退休，於是佢選擇咗薯仔公司嘅一個行政助理嘅職位。憑住過往嘅經驗，得到行政部經理嘅賞識，成功得到薯仔公司嘅offer。呢日係佢第一日返工，嚟到邪惡人事部完成手續之後就正式開始佢嘅工作。
花師奶呢個職位係一個Replacement，代替一位行將離職嘅同事。呢位即將喺兩個星期後離職嘅同事叫小櫻，佢做呢個職位已經係第五個年頭，對所有工作都已經十分熟悉，呢兩個星期佢嘅責任就係要將工作handover畀花師奶。
嚟到花師奶成為薯仔公司員工嘅第33小時25分35秒，身在邪惡人事部嘅薯蓉先生突然收到行政部經理一個電話。
「喂，你上次行政助理啲CV做有冇剩？我想再睇下有冇啱。」
薯蓉先生深感不妙，花師奶返工只係一日多啲，莫非咁快已經做錯事？於是問下經理發生咩事，佢就話：
「小櫻話佢學嘢好慢，講極都唔明喎。」
薯蓉先生心諗人地只係返咗工一日多少少咋喎⋯⋯
「我冇曬CV喇，你會唔會再觀察多一陣呀？我地有三個月試用期喎。」
「你再喺CPjobs出多次廣告啦，我想睇多幾個。」
作為一個新人，小櫻畀花師奶嘅時間係33個小時，然後就向行政部經理打小報告，想佢重新請人。
不過好好彩，師奶最後憑住佢自己嘅實力捱過頭一段危險嘅新工作適應期，喺行政部經理搵到另一人選之前，已經慢慢熟習工作，最終成功過咗試用期。
新嚟新豬肉，往往新人去到新公司，都需要一段時間去適應新工作。行為心理學有一個理論叫21天效應，意思係一個新習慣或新理念要形成並鞏固，至少需要重覆做21天。新人去到新工作岡位，相信至少有N個新理念同新習慣需要重新培養。21天、甚至三個月試用期可能都未必足夠。
喺花師奶呢個故事入面，小櫻想喺兩星期內將佢五年學識嘅嘢教畀花師奶，而佢同行政部經理只係畀咗33個鐘頭佢適應。可能因為香港節奏急速，即食文化影響深遠。買嘢要即用即見效，新人要即請即好用，但真係公平咩？如果下下都要咁即食，HR真係暈喺度。
做新人嘅時候壓力特別大，驚做錯少少就令人有壞印象。人人都做過新人，但就唔係人人都識得體諒新同事。自己做得耐，啲嘢當然熟，但新人只係啱啱入職，唔識做就覺得佢蠢佢唔醒目。人係需要時間習慣，點解唔嘗試將心比己？畀多啲時間新人適應同證明自己呢？
