低薪、職業倦怠、疫情嚴峻等，都成為歐美掀起「大辭職潮」（Great resignation）的原因，正在閱讀這篇文章的你也可能考慮當中。很久之前網絡瘋傳一個辭職奇聞，講一個後生仔在Whatsapp跟老細請辭，言明不會補一個月通知金，更叫公司計足糧及年假給他，否則勞工處見，明顯他常識不足，辭職禮節也欠奉。筆者不是老闆，但認識不少老闆及任職人事部門(HR)的朋友，聽過不少離職奇聞跟大家分享下。
1. 分手方式古怪：
上面位人兄Whatsapp講句就當辭職；有人就選擇Whatsapp emoji公仔句子(例子見圖)，連字都不用打，認真有創意；有人就進化到以Whatsapp傳遞辭職信圖像，若果你當whatsapp等同電郵，佢又無錯喎(笑)。曾經有個做HR的朋友收過Whatsapp辭職通知，遂叫對方補封正式辭職信，對方居然回覆「唔洗啦，我咪通知咗你囉。」再要求多次，他索性叫你幫手寫，令我朋友哭笑不得。
2. 分手原因創新：
分手方法古怪，分手原因也很有創意，記得網上見過一封辭職信鏗鏘數個字寫著：「世界那麼大，我想去看看」，幾偉大幾有理想，看完真不忍心挽留辭職那人。最近也有一篇動之以情，說人工低所以不開心暴食致肥怕影響公司形象，明顯玩嘢。也有些人說在公司懷才不遇、醫生診斷有抑鬱症…真係創意無極限。
3. 突然人間蒸發：
離奇古怪的人多的是，不少更是突然銷聲匿跡，一句交代都沒有，曾聽過有新人上班數天後突然無上班，上司、同事、人事部打電話找到他就掛線，之後更加連電話也不通。好似見鬼咁，東家唔打打西家有多平常?交代一句很難？好來好去嘛。有些人就是這麼莫名其妙。
4. 辭職現形記：
辭職後頹做，似乎是很多人的常規，頹做的程度有時甚至令人咋舌，例如老細叫入票，他推卻腳有事；同事叫他開下門，他發脾氣；上司指派工作，轉頭叫上司自己攪掂；返工例遲；偷偷出街處理私人事務或吃個漫長下午茶；在公司肆無忌憚吹水、上網、玩手機…其實，世界很細、職場更細，將來難保不會再遇舊老細、舊同事，大家唔好學，日後好相見。
5. 未入職就辭職：
入職前俾足一個月或更長通知期，但到履新日就不見人，而且無原因、無通知、無致歉，激死很多HR朋友仔。
