一份好工的定義

朋友呀炳，佢年近三十歲，冇拍過拖。身邊嘅朋友都知佢好恨拍拖，一有機會就會介紹女仔畀佢識。咁耐以嚟，介紹畀佢嘅女仔冇十個都有八個，但每次介紹完之後都冇下文。朋友成日問佢點解，佢每次會嫌人地呢樣嗰樣。有一次，大家出嚟食飯聚會，就問下佢嘅擇偶條件。
 
佢好認真咁諗咗陣，然後答：「好簡單啫，外形要靚靚地、有啲身材、有啲氣質、唔可以MK、出身唔好太差。嗱！好似陳瀅嗰type就啱我喇！咁性格就要溫柔、就得人、唔好成日買名牌、最好肯陪我食老麥。」
 
我地成班人都聽到呆咗，佢要求竟然咁高！有位比較毒舌嘅朋友龍哥忍唔住問佢：
 
「你可唔可以話畀我知，點解陳瀅要揀你唔揀我呢？」
 
呀炳一臉尷尬咁話：「如果我同龍哥你比又邊有得比吖！哈哈哈⋯⋯」
 
龍哥繼續唔放過佢：「咁其實你點樣定呢啲條件出嚟？」
 
呀炳又諗咗一陣：「咁要揀梗係揀個最好㗎啦！樣靚身材正、性格又唔太港女，咁嘅條件係男人都想要㗎啦！」
 
呢個時候，明眼人都睇得出龍哥聽到有火，不過佢仍然平心靜氣咁講：「呀炳，咁多年朋友我先同你講，人要知道自己需要啲咩先會搵到自己想要嘅嘢。」
 
我地聽到哇哇聲，龍哥呢句金句勁過溏心風暴入面司祺姐啲生硬金句。最後呀炳喺度傻笑，希望佢返去會好好咀嚼下句金句，唔係可能永遠都唔會搵到心中嘅女神。
 
龍哥呢句金句令我諗起好多人搵好工嘅條件。喺我地成長嘅過程中，好多時身邊嘅親朋戚友，已經幫我地定義咗乜嘢為之一份好工，然後大家對呢啲條件嘅工作都趨之若騖，對好工嘅定義就好似呀炳嘅擇偶條件一樣咁高。
 
1.人工要夠高 輸蝕太糟糕
 
「入職前叫價一定要夠高，唔係就好蝕底，offer唔到位都唔好做。轉工？起碼都加40%啦。」
 
2.福利要夠多 唔止普通科
 
「公司福利一定要夠多，醫療呢啲係基本，最好有埋牙科、人壽保險，就算我全家好幸福都要包埋我全家。另外要多啲特別假，生日假、婚假、媽媽爸爸仔女生日假、兄弟姊妹結婚假。星期五要放早，放病假唔駛交假紙⋯⋯咁就為之perfect池喇！」
 
3.雙糧加花紅 保證唔會窮
 
「大佬，冇雙糧點交稅呀？最好有雙糧之餘再加幾個月bonus，買樓首期、環遊世界指日可待！」
 
4.返工近近地 唔駛咁早起
 
「返工嘅距離係遲到嘅關鍵，所以返工地點一定要喺30分鐘車程內。最好喺屋企樓下返啦。」
 
5.準時早收工 清潔好輕鬆
 
「人生點可以攞嚟OT？份工一定要畀我準時收工，好似政府工咁就更好喇。返到屋企，大把時間打掃、洗衫、煮飯，咁先叫人生呀。」
 
雖然以上嘅條件都冇對錯，但只有你自己先明白需要幾多。打工當然要有合理嘅薪酬待遇，但點樣定義一份好工，就要先搵出自己需要啲咩，先可以真真正正搵到心目中嘅好工。