見工面試，除咗係畀HR或者未來上司了解你過去工作經歷同能力之外，仲係打工仔同公司互相理解嘅過程。通常我哋會預計HR會問啲咩，然後盡能力作答，但面試係雙向，打工仔可能忽略咗「我哋可以問啲咩？」。
喺面試嘅最後，HR可能會問「你有無咩問題想問？（Do you have any questions? ）」，如果你答：「無。」咁回應唔止係錯，更錯失咗你可以更了解呢間公司嘅機會。
舉一個例子，Kenneth同Alan同樣得到Marketing職位嘅面試機會：
Kenneth：「我想知道每年有幾多日年價，OT有無補水，保險包幾多次睇醫生，呢啲benefit幾時用得？」
First interview就問福利實在係太早，對於面試官嚟講，你關注嘅係自己可以得到啲咩好處，而唔係對呢份工作有好大興趣。
Alan：「OK呀，你頭先已經講晒呢個職位做啲咩，其他問題應該做落先知。」
咁樣答又顯得好被動，同樣，佢亦無表現出對呢個職位有好大嘅興趣。做落先知？你有無得做都未知。
問問題唔係為咗單純表現自己有幾大興趣，更加可以畀你了解公司多啲，知道工作上會遇到啲咩挑戰多啲。而面試官嘅答案亦可以畀你考慮同自己本身嘅期望有無落差。
如果我哋係Kenneth或者Alan，可以點問？
「多謝你畀呢個機會我了解公司多啲。啱啱聽你講呢個職位主要係做planning，但實際execution係交畀agency去做，咁過往出campaign會唔會有好大落差？呢個做法係因為咩原因？」
咁樣問嘅話可以表現到你點樣切身處地咁喺呢個職位入面諗嘢，亦可以從中講下自己點樣為公司帶嚟啲咩改善。
做足準備
諗下除咗人工福利之外，仲有咩決定性因素影響想唔想喺呢間公司做，可以從過往嘅不愉快經歷入面回想下。列出8-10條問題擺喺袋，根據唔同嘅面試官，問返相應嘅問題：
- 如果見人事部經理（HR Manager）：
可以問同公司、部門相關嘅問題。 - 如果見招聘經理（Hiring Manager / Talent Acquisition Manager）：
可以問工作內容，對申請人嘅期望同呢個Role有咩挑戰等等嘅問題 - 如果見管理層（Top management / Senior management）：
可以問行業相關，未來預測同願景嘅問題，你亦可以喺傾談當中「Show quali」，畀對方見到你對行業有幾多認識。
問咩問題 取決於時機
問幾多問題，幾時問，係由你自己判斷，見工面試唔係得一次機會（雖然大家都想一擊即中），今次唔得，下次你會學精知道點拿捏。喺之前嘅例子Kenneth問及有關「福利同假期」嘅問題，唔係唔問得，不過一定唔會係First round interview問。
安全起見，會建議Focus喺工作內容，職責，公司會點幫你適應環境，有咩Training等等嘅問題，到你真係有Offer，再慢慢了解有咩福利都未遲。
面試並唔係單向而係雙向，盡可能喺有限嘅面試時間入面，畀你同面試官有更多了解，畀雙方睇下係咪適合大家（相睇？誤）。希望大家見工順利！
