為咗搵到理想工作，你寫咗一封出色嘅求職信，再細心改動CV，終於獲得面試機會。當你面試時，展示自己係完美候選人嘅時候，面試官突然問咗你一個出乎意料嘅問題：「你有咩缺點或弱點?」呢個時候你又應該點答? 點先可以避免留下唔好嘅印象？
誠實回答
絕對唔好話自己無缺點，畢竟無人係完美嘅，但都唔好輕率咁回答「我太過於追求完美」或「我係個工作狂」之類嘅答案。首先，大多數公司都希望員工能夠係工作同生活之間取得適當嘅平衡，更重要嘅係，所有面試官都會睇穿呢啲回答，並容易覺得你唔真誠，或認為你準備得唔夠充足。
做好準備
面試前，你應該先諗好點回答呢個問題，最好準備至少三個缺點，以臨場應變列舉唔同例子。喺準備過程中，你應該細心審查面試職位嘅基本要求，避免舉出嘅缺點同呢啲要求有衝突，否則可能會令你被淘汰!
面試官問呢個問題主要係想測試你點應對工作中嘅挑戰或困難，回答時你應該盡可能展現你處理問題嘅能力。如果諗唔到，你可以參考過去Appraisal中上司指出嘅問題，再指出你點做改進。
Hard Skills vs Soft Skills
喺面試中，你指出自己嘅缺點最好係以Hard Skills 為主，因為Hard Skills 係可以學習嘅事情 (例如: 懂使用電子表格軟件或識講第二種語言)，Soft Skills 則係指性格特質 (例如:懂得避免衝突或積極成為溝通橋樑)，所以Hard Skills比較容易改善，而Soft Skills卻可能需要更多嘅時間和努力改進，所以面試中應該選擇以Hard Skills作為談論嘅缺點。
例子：
Hard Skills
不懂某個軟件
不了解對特定領域術語
不認識會計程序
Soft Skills
對公開演講感到焦慮
不願意將工作委派其他同事，傾向自己完成所有任務
在團隊合作時缺乏耐心
今次就講咗喺面試中應該點應對「你有咩缺點?」呢個問題，下次就會分享點以聽起嚟似優勢嘅方式嚟粉飾你嘅弱點，記得留意CPjobs嘅分享喇。
原文: https://www.cpjobs.com/hk/article/how-to-speak-positively-about-your-weaknesses-part-1
