有無諗過搵工都隨時危機四伏？就算收到offer都唔好咁開心住，隨時上咗賊船自己都唔知。今時今日搵工淨係留意人工同職位（特別係無經驗嘅Fresh Grad）係未夠，咁樣好容易會跌咗入伏工陷阱。正所謂：魔鬼在細節，唔想留下血的教訓，就要留意下有無「伏工5大跡象」！
1. 招聘廣告（Job ad）上嘅特別字眼
從招聘廣告字裡行間已經可以知道呢份工有無伏，有啲字眼經常都會出現喺伏工嘅招聘廣告上面，例如:
- 「可以喺壓力同時間緊迫嘅情況下工作 (able to work under pressure and tight timeline)」;
- 「非辦公時間需要工作及回應 (responsive and able to work at non-office hours)」;
- 「有能力同時間處理多個項目 (multi-tasking ability)」
睇完都估到份工會忙到廁所都無時間去，可以CV都慳返唔使send（除非你係工作狂）。
2. 經常見到間公司請人
如果見到一間公司長期都請緊人，仲要係同一個職位嘅話，可能就要諗清楚先apply喇，長期請緊人可能代表公司流失率高，不斷請同一個職位更可能代表嗰個職位係「豬頭骨」，有新人入職都好快會辭職，無人做得長。
3. 有福利 = 無福利
伏工其中一大特點就係佢哋嘅「福利」，伏工會根據《僱傭條例》入面最低嘅要求做佢哋嘅福利，例如：7日大假，MPF。甚至有公司將5天工作當係福利！明嘅就明，呢啲公司應該都比較「慳」，搵工時見到就自己衡量下申唔申請啦。
4. 收工時間先約見工
收到電話約你見工嘅時候，除咗記低見工日期時間之外，仲可以留意下HR打嚟嘅時間，如果你收到電話嗰陣已經係7，8點，甚至係星期六日，咁你可能就要做好心理準備，入職後隨時無限制OT…
5. 即日請
最多人公認嘅伏工特徵就係見完工之後即日就話請你。當你即日就收到offer，唔好以為自己好有料，或者老細好欣賞你所以就即時畀offer你（唔排除有呢個可能，但你自己知自己事啦），試下諗清楚interview嗰陣，自己表現係咪好到識飛先。如果唔係，分分鐘係純粹份工伏味太濃，無人肯見，一有人見就即請。
如果真係唔好彩中伏都唔使灰心，大不了咪搵過第二份囉（傳送門呢度），所以唔好氣餒。祝大家都可以搵到份好工！
