第一印象定生死
有冇見過人踢拖、背心、短褲咁去見工？CV用錯字型，嚴重性就好似着錯衫去見工一樣——見光死，任你張CV吹到曉飛，面試對答如流，都改變唔到interviewer對你嘅印象，因為根據研究，第一印象會喺3至5秒內形成，而且持續好長時間，今後都好難再改變。
如果你為咗面試買咗套suit、皮鞋，出發前仲要gel頭，咁實在冇理由唔花3分鐘為你張CV化個靚妝先send出街見人。
同樣嘅字型仲可以用喺Cover letter，就好似西裝外套要襯番條西褲同對皮鞋一樣，除咗好睇之外，視覺上consistent啲，感覺更pro。
讀者嘅眼睛未必係雪亮嘅
坊間關於揀字型嘅資源其實唔少，中文、英文嘅都有，不過好多都係從graphic designer嘅角度出發，件事就即係好似搵fashion designer幫你設計一套最前衛嘅戰衣，行catwalk一流，但係你着去見工喎。
無論CV、Cover letter，抑或其他任何文件，最重要都係考慮番個target audience（目標受眾），究竟寫嚟俾邊個睇呢？讀者嘅閱讀習慣同閱讀模式係點呢？
按照一般公司請人嘅流程，你份CV首先會由junior嘅HR同事篩選，可能有成幾百份，咁睇每份CV嘅時間都會好短，雖然同事可能比較年輕，好眼力，但係閱讀時間可能只有短短幾十秒時間，如果啲字母個個差唔多樣，難以分辨，係會降低閱讀速度，所以字型嘅辨識度（legibility）同易讀性（readability）非常重要。而且要喺咁短時要留低印象，除咗內容本身，就係靠字型，好似考公開試作文咁，字嘅美醜會影響分數已經係公開嘅秘密。
下一步可能會由senior嘅HR同事再揀吓，之後畀你將來嘅上司同老細睇，如果你apply嘅係senior啲嘅職位，咁你嘅上司老細嘅年紀就會比較大啦，近年老花亦有年輕化趨勢，四十歲可能對眼已經開始老化，所以耳未必聾嘅，但係眼就可能矇矇地嘞，字體大小固然係重要因素，但係考慮到喺1-2兩頁紙嘅CV度盡可能放多啲內容，字唔可以太細又唔可以太密，就唯有靠字型本身搭救，字型嘅辨識度（legibility）同易讀性（readability）非常重要。
完全變態嘅CV
毛毛蟲經過完全變態，蛻變成蝴蝶，佢要識飛先至可以喺完全唔同嘅生態環境中生存；同樣，你send出去果份CV都會完全變態，變成一「張」CV。經過上面提到嘅篩選過程，喺面試果陣HR同事通常會將你份CV打印出嚟，方便interviewer同你面試果陣參考。所以你張CV要適應喺電腦屏幕同紙本呢兩種唔同嘅使用情境，就要選擇可以適應不同生態嘅字型。
可惜好多傳統字型都係電腦面世之前，甚至五百年前古騰堡發明活字印刷術之前設計出嚟，喺電腦屏幕上顯示果陣辨識度較低，冇咁易睇，而早期專為電腦而設計嘅字體又由於各種技術條件所限，順得哥情失嫂意，印刷出嚟嘅效果可以接受，但係並唔理想。
珍惜機會，遠離Arial
2019年啦，Microsoft Office嘅 default字型都轉咗做Calibri啦，仲用Arial、Times New Roman咁90年代？唔好着你老竇件飲衫去見工啦，由今日開始，向Arial說不！
太穩陣嘅Calibri
除非你打算偽造文件，否則Calibri應該係最穩陣嘅選擇。
加拿大富豪同巴基斯坦首相先後因為文件「用錯」字型，結果被揭發偽造文件而身敗名裂，身陷囹圄，字型嘅作用又點止係靚唔靚咁簡單。
所謂最穩陣，係指幾乎所有Windows PC都有呢款字型，send DOCX檔案都唔怕對方電腦冇呢款字而走位，不過亦都係因為個個都有，所以實在太悶——開Outlook係佢、開Excel又係佢、開PowerPoint都仲係佢，更靚嘅嘢一日對足八個鐘都會審美疲勞。
另一方面，Calibri係為電腦屏幕而設計，列印效果未如理想，系統自帶嘅字型基本都有類似問題，而且幾乎部部電腦都有，濫用同用到爛嘅情況非常普遍，應該盡量避免使用，包括Georgia、Verdan、Cambria、Candara、Constantia等等。
要用系統冇嘅字，對方開出嚟又睇得到，忠實呈現你揀嘅字型，本文最底會教你一個秘技。
Helvetica — 字型中嘅Chanel
如果Arial就係一件貨，咁Helvetica就係Chanel，美感方面冇咩好挑剔，可以話係眾多designer愛用嘅首選字型，但係最大嘅問題亦都係喺呢度。你張CV用Helvetica，就好似孭隻Chanel袋入去面試，然後發現同全部candidate撞袋。更靚都好，如果同成街人撞款，你都唔會孭出街啦。
Helvetica另一個問題，就係辨識度低，典堂級字型設計大師Erik Spiekermann忍唔住專門點名批評Helvetica「難睇」。
Gill Sans – 好睇唔好用
Gill Sans係另一個公認好睇嘅字型，成份文件離遠望落係幾靚嘅，但係真係要睇內容就不了，因為佢當初係為標題（headline）設計，唔適合作為內文字體。其實一個字型難唔難睇，做個簡單嘅測試就知，開個document，copy & past以下一抽字落去，將font size設定為12pt或以下，再試唔同字型。
1iIlLrnmun0Oo
你可唔可以好輕鬆咁讀出以上嘅係咩字母？（答案喺下面）
又或者可以用番Spiekermann大師嘅例子：
1milliliter
老老實實，串錯字都應該唔會睇得到囉。
當然易混淆嘅一定唔止呢幾個字母，我哋只係攞最突出嘅嚟做例子。呢幾個字母易認嘅話，證明設計果陣有考慮到辨識度，咁成個字型嘅所有字都會易認，可以放心用。
測試答案：數目字一，細階i，大階i，細階L，大階L，細階R，細階N，細階M，細階N，數目字零，大階英文字母O，細階英文字母O。
精選CV字型
根據以上所講嘅條件，即係辨識度、易讀性、少撞款，筆者同cpjobs編輯部精心挑選咗幾款字型，考慮埋工種、資歷深淺，本文最底可以攞到官方免費下載連結同教學，自己睇下邊款合眼緣就隨便攞去啦。
傳統專業工種
《Typography for Lawyers》作者Matthew Butterick身兼律師、字型排版專家、程式編寫員等多個專業，連佢都推薦嘅字型，適合各類專業人士，例如律師、會計師、工程師、測量師、建築師等等。
呢類字型名稱中有時會有所謂嘅「serif」，中文叫做襯線，源自古代石匠雕刻碑石技法嘅副產品，經年累月逐漸變成咗一種特色，等同於中文用毛筆寫字，筆劃自然會有粗有幼，易寫出筆鋒，例如新細明體，而英文字型嘅典型例子就係Times New Roman。
由於serif歷史悠久，所以俾人傳統、穩重、專業嘅印象，自然亦較為適合專業工種CV使用。
Source Serif Pro
Adobe同Google合作開發嘅開源（open source）字型，有Adobe對設計嘅高要求同Google嘅技術，設計之初就追求極高嘅泛用性，務求一舉征服任何大小同像素嘅屏幕，同時亦都兼顧印刷嘅要求，適合作為所有文件嘅default字型。
Literata
Google專為Google Play Books而設計，設計嘅目標除咗要求辨識度同易讀性高，適合閱讀長篇文章同書本之外，就係要為Google Play Books建立一眼就認到嘅獨特形象，所以完全符合CV嘅要求。
設計意念嚟自serif字體嘅始祖——roman字體，自然亦有濃厚嘅書卷氣，文職類尤其合用，或者比較保守嘅行業如銀行、金融等亦都可以。
IBM Plex Serif
故名思義，係由IBM出資開發，目的係取代Helvetica，自然要有對等嘅質素，而且要反映品牌理念同精神，可以話呢個字型本身就包含咗IBM大企業傳統穩健嘅屬性同品牌性格。
現代行業、創意工業
相對於傳統嘅serif字體，有sans-serif字體。sans係法文，意思係「無」，換言之就係冇襯線。字嘅線條會比較實淨，所以近年為咗電腦同手機屏幕而設計嘅字型多數以sans-serif為主，現代感較強，幾年前連Google都將logo改為sans-serif字體。近代出現嘅行業，或者需要創意嘅行業就比較適合。
Source Sans Pro
Source Serif Pro嘅sans-serif版本，大小同設計風格同Source Serif Pro完美搭配，辨識度完全冇因為冇襯線而受影響，喺屏幕嘅表現甚至更出色，整體現代感極強。
Fira Sans
出自大師Erik Spiekermann嘅手筆，血統純正，為Mozilla Firefox OS而設計，保持Spiekermann作品一貫嘅高辨識度特徵。
IBM Plex Sans
IBM Plex系列嘅sans-serif版本，受Franklin Gothic字型啟發而設計，而Franklin Gothic常見於廣告及報紙頭條，因為有呢個DNA，吸引讀者注意力嘅效果較強。
中日韓
雖然係英文CV，但係有啲情況可能都需要用到拉丁字母以外嘅語言，例如繁體中文、简体中文、日文、韓文等等，視乎英文揀咗serif（明體/宋體）定係sans-serif（黑體），中日韓文就揀番對應嘅字體。
思源黑體/宋體
早幾年Adobe同Google合作出咗兩套博大精深嘅開源字型，仲涵蓋港、台、中、日、韓五個地區嘅字形，連各地漢字嘅些微差異都照顧到。
即刻Like我哋Facebook，PM小編send字型嘅download link同秘技畀你啦！
