大家有冇同外國人一齊做嘢嘅經驗呢？有冇試過遇到一啲情况係完全唔明對方會咁做嘢，最死係咩呀？係佢覺得冇問題呢吓先惡頂呀！今日就等我哋探討吓香港同外國人喺工作文化方面有啲乜嘢唔同啦！（利申呀，我哋訪問嘅人不代表全宇宙其他人立場呀！）
1）工作節奏
香港人眼中：
香港：工作節奏比較快，更改會多啲，諗到就即刻做。
外國：工作節奏會比較慢，偏向有系統及步驟。(嗱你睇我講嘢幾咁圓滑呀〜)
外國人眼中：
香港：工作節奏明顯急好多，反應都快啲，會有好多唔同新鮮嘅工具，十分有趣呀
外國：好多嘢都好花時間呀，返到公司要打下招呼寒暄吓，亦要有足夠嘅lunch break，仲要覆埋啲唔知覆嚟做乜嘅email！
2）加班工作
香港人眼中：
香港：OT呢家嘢，大家香港人你明㗎啦邊有得話say no㗎啫
外國：佢哋好注重work life balance㗎，OT？傻傻哋㗎你都〜
外國人眼中：
香港：OT簡直就係佢哋嘅文化呀，佢哋一邊投訴一邊又接受喎，奇奇怪怪咁〜
外國：必要及合理嘅時候我哋會接受，但你必須有理由說服到我
3）收工處理工作
香港人眼中：
香港：老細send到比你梗係要覆，你唔覆禮拜一又比人捉入房照肺
外國：Well，有咩我哋禮拜一返工再講〜
外國人眼中：
香港：當然會處理啦，工作融入佢哋嘅生活，就算係weekend佢哋都會處理
外國：No,no,no~收工呀嗎，收工仲做嘢就唔叫收工啦〜
4）開會
香港人眼中：
香港：討論為主，會係會議入面傾該議題嘅嘢，開完就直接執行
外國：報告為主，會先有detail plan，係會議中report比大家聽，大家提問，開完再開始實行
外國人眼中：
香港：唔會有一套開會嘅系統，佢哋開會係為咗解決問題
外國：Brain storm -> Strategy -> Action plan，太多嘢啦佢哋〜
5）持反對意見時
香港人眼中：
香港：直接表達出嚟自己認為唔好嘅地方以後再討論
外國：會先稱讚對方好嘅地方以後再十分非常極之婉轉咁話認為有更好嘅方案再提出自己完整嘅方案說服對方
外國人眼中：
香港：唔會話比你聽咁係唔好，會直接比第二個建議你
外國：會話你嘅方案好好然後再比建議你，除非完全係錯如果唔係都極少正面拒絕
6）對不屬自己工作範疇嘅工作
香港人眼中：
香港：拒絕佢老細又講一堆嘢覺得你唔勤力，頂硬上啦唉
外國：表示呢樣唔係佢工作範圍，然後請你搵翻相關同事
外國人眼中：
香港：佢哋會接受你嘅請求，但佢哋本身都有好多工作，咁會令佢哋工作質量唔太好〜
外國：唔係我範疇你仲搵我？
7）要求加薪
香港人眼中：
香港：比較少主動要求，大多都係唔滿意加薪幅度再同上面傾
外國：會主動同上司要求加薪，對佢哋嚟講係比較平常嘅事
外國人眼中：
香港：認為唔洗開聲人哋都會加比你？係唔記得問？定喺怕尷尬呀？
外國：經常會提出呢個問題，就好似佢哋只係在意錢咁〜
8）工作上嘅彈性
香港人眼中：
香港：返8個鐘就stay晒喺office，work from home甚麼的基本係妄想
外國：彈性較大，能夠接受work from home或者remote work
外國人眼中：
香港：都算彈性㗎
外國：超級彈性呀〜
9）職場相處
香港人眼中：
香港：階級觀念比較重同明確(就算唔係做緊嘢)，存在對前輩要低聲下氣等嘅情況
外國：公私分明，會感覺到佢哋係以朋友身份同你相處以非上司 / 下屬
外國人眼中：
香港：同事之間相處會好融洽
外國：只會有工作間嘅聯繫
10）管理文化
香港人眼中：
香港：發揮空間較細，可以比你提出意見嘅地方都係比較無關痛癢嘅地方
外國：feel free比你發揮但會你全程需要無時無刻同佢哋report〜
外國人眼中：
香港：叫你做乜就做乜啦〜
外國：比指令你但由你去話比佢聽點達成呢樣嘢
✦✦✦
不論是什麼年紀，追求自己所喜愛的事情而決定重頭開始並沒有錯。假如您希望投身於科技行業，讓GetLinks陪伴您走過路上的每一步吧！
