如果話畀你聽有份咁嘅工：彈性上班時間、人工比市價高一截、花紅派夠幾個月、大假有廿幾三十日、OT雙計、公司有會所級設施、包你早午晚三餐、返工放工車錢有得claim、醫療牙科人壽保險包你全家、MPF公司幫你供雙倍、仲有罕有嘅住屋津貼幫你上車。假設你已經過曬所有面試程序，你要得到呢份絕世好工嘅要求好簡單，只需要承諾兩大條件：
1.公司要你做乜就做乜
2.你呢世都唔可以轉工
你做定唔做？
人人都夢寐以求一份好工，喺今時今日嘅香港，呢種級數嘅福利絕對屬怪獸級。面對呢啲令人唾涎三尺嘅福利，就好似上一代人搵到份有長糧嘅政府工一樣，打一世工又有乜所謂，其實真係好難拒絕。
我有個朋友，佢有個親戚叫易先生，易先生以前讀書好叻，幾十年前喺香港某大學畢業。眾所周知，喺嗰個年代入到大學，已經係社會上嘅精英。由於佢係精英嘅關係，好順理成彰就畀一間香港數一數二嘅企業招聘咗入去做。企業嘅福利當然都係神奇頂級超卓，公積金仲多過而家嘅強積金多多聲。以前上位速度較快，加上精英嘅關係，唔駛幾年佢已經做到經理級管理層。做到咁高職位，有權有勢，一做就做咗廿幾年。
2007年金融海嘯席捲全球，雷曼兄弟事件令全世界經濟陷入谷底。好景不常，易先生嘅公司都深受其害，為節省成本決定要進行大規模裁員。好不幸地，易先生成為咗裁員名單上嘅其中一員。當時易先生嘅公司為員工派發肥雞餐，比起一啲只跟勞工法例賠償嘅公司己經叫做好好多。因為易先生係管理層，佢人工比較高，得到隻肥雞都比較大隻，拎咗大舊錢返屋企先慢慢再打算。
一時間佢由一個公司有權有勢嘅人變成一個冇收入冇地位嘅人，佢嘅自我價值好似一夜間消失咗。金融海嘯期間搵工難，易先生想搵返一份同以前差唔多人工嘅工，但呢幾年又冇乜進修過，電腦都唔係幾識用，結果佢搵咗成年都搵唔到工。佢拎住舊錢於是開始玩起股票嚟，炒下炒下發現都搵到啲錢，生活又自在，於是就全職炒股。結果好景又再不常，股票越玩越大，甚至要問人借錢，最後連錢都還唔到要申請破產。到咗十一年後嘅今日，佢嘴邊依然講緊當年幾咁有權有勢、福利幾咁好， 年華老去嘅今日，依然放唔底當年份好工。
無錯，一份好工可以帶畀你安逸嘅生活，但同時過份沈醉喺呢種生活入面，可能會令你失去進步嘅動力。當你建立嘅價值都係圍繞住份工，一旦你失去嘅時候，可能會連同你自身嘅價值帶走。如果你做緊嘅工作係一份別人眼中唔係咁好嘅工，唔好介意，呢個可以係一個磨練，令你更有動力追求自己嘅理想。
