出嚟做嘢之後，你有無懷念以前讀書嘅日子？如果叫你一邊做嘢一邊讀書，你又制唔制？
成日聽人講「數碼轉型」、「轉型升級」，要增強職場競爭力，進修讀書似乎係最好嘅選擇。坊間進修課程五花百門，加上有政府資助（持續進修基金），令唔少打工仔有興趣報讀，希望增值一下，最重要係令自己喺職場上嘅價值有所提升，唯一擔心嘅係怕半工讀會兼顧唔到。
凡事都有兩面睇，傾向進修嘅人覺得學多一樣知識或技能會比其他人優勝，學多樣嘢傍身到有需要時總會幫到自己，可能有一日老細見你多才多藝隨時升你職（機會應該大啲掛）。
而傾向專注工作嘅人就表示平日做嘢已經夠辛苦，仲有機會要OT，如果仲要用額外時間去上堂，傾project，做assignment隨時兩頭唔到岸，影響生理同心理健康，倒不如專注工作等老細賞識，橫掂終極目標都係升職啫！最驚嘅係，老細知道你識得某啲技能之後，可能特別「睇重」你，畀更多機會你「發揮」，但到時「加辛」定「加薪」就睇彩數喇。
驟眼睇進修要用額外時間精力，難免會辛苦啲，但如果決定咗，都要好好計劃一下點進修先係最好！例如：選擇進修課程之前考慮清楚課程對自己嘅工作同前途會唔會有幫助，盡量避免貪得意選擇唔適合自己嘅課程（如果係興趣就另計）。另外，要識得分配進修同工作嘅時間，嘗試用schedule book幫助自己記錄同分配時間，令進修唔會影響到工作。仲有，記得申請持續進修基金資助減輕經濟負擔啦！如果各位打工仔有時間同金錢，相信進修會係一個唔錯嘅選擇，可以增值自己又可以為自己嘅職途做好準備。
不過各位打工仔想升職加人工，除咗進修之外，轉工都係一個唔錯嘅選擇，「魚唔過塘唔肥」呀！
