成日畀老細嫌做嘢慢？今日又做唔哂啲嘢要OT？除咗係工作量大之外，可能係時間管理出咗問題，令工作效率大大降低呀！想準時放工，唔使畀老細鬧，每日多啲me time？試下用「FAST」法則啦！
「FAST」分別代表4個英文字，「Frog」、「Action」、「Slice」、「Time」：
「Frog」(青蛙)
代表每日「最重要」或「最困難」嘅工作，必須每日優先處理！好多打工仔都鍾意「先甜後苦」，習慣做晒簡單瑣碎嘅工作先，最後先做返重要或者困難嘅工作，但呢類工作往往先係最花時間同心力。畀啲「Easy jobs」chur 完一輪可能都用咗唔少精神，仲點會有心機去做難度比較高嘅工作？自然會覺得特別攰同辛苦，甚至選擇逃避，寧願去 hea 都唔做，最後要變 deadline fighter。
好嘅時間管理重點並唔係「達成率」，而係點樣計劃「行動」！
「Action」(行動)
代表你嘅行動清單（Action list），你可以將每日嘅工作分類為「青蛙」同「蝌蚪」。「青蛙」即係相對困難同重要嘅項目；「蝌蚪」就係相對比較簡單，例行公事嘅工作。將工作列晒出嚟，畀自己或者 Teammate 有一個清晰嘅工作方向，做嘢都爽手啲！不過清單切忌 set 得太長太多，唔係嘅話見到都無心機做，每日 1-3 隻「青蛙」加上 5-7 隻「蝌蚪」就最理想啦。
「Slice」(切片)
好似字面咁解，將「青蛙」解剖切片（誤)，係將困難嘅Task拆成細份咁解。打工仔鍾意「先甜後苦」嘅原因，無非係重要嘅工作多數都係複雜同困難，做嘅動力比較細（直頭唔想面對），所以不妨試下將「大青蛙」就住佢哋重點分拆成唔同嘅細 part，循序漸進去解決，感覺咪會無咁痛苦！
「Time」(時間)
訓練時間感。好多人對時間無咩觀念，成日覺得仲有好多時間剩，可以 hea 一陣再做，唔覺唔覺到收工都係咩都未做。有無聽過有人用手機鬧鐘提自己飲水？同樣，你都可以 set 鬧鐘去提醒自己應該幾時做嘢， 幾時休息，等自己可以跟住schedule去行。當然，最重要係「行動」！
善用「FAST」法則，可以大大改善工作效率，唔使日日OT，老細見到隨時升你職加人工呀（理想嘅話）！不過，講返轉頭，會唔會真係多嘢做得濟，而老細又特別Chur呢… 如果係，可以撳左上角CPjobs logo，再喺search bar打返心水職位，睇下有無好路數啦！
